Saturday, August 26, 2006

中國女排

自04年雅典奧運睇完女排決賽 - 中國對俄羅斯之後,便愛上了中國女排。所以上年同今年的世界女排大獎賽 - 香港站,我都入場支持。我諗除左皇馬、曼魚到港,可令大球場爆棚之外,都無咩體育比賽可以令紅館爆棚,氣氛一流。結果中國以3:0輕鬆擊敗俄羅斯,奪得分站冠軍。

記得04年同自己講過,08年北京奧運之前,希望自己可以達成目標之後,走到首都睇比賽。但係兩年已經過去,得番兩年,還有好多路要走。好大壓力...

Sunday, August 20, 2006

4個求知; 2個投資

早係一兩年前,我已經叫幾位舊同學要學習投資。所謂富者越富,因為佢地用賺番o黎嘅錢再搵錢。我絕對唔係叫佢地抄股票,而係認認真真咁去買一d可以長線揸住嘅股票。

佢地問:「咁買咩好呀?」。因為佢地都係第一次買股票,所以我叫佢地買匯豐先。我話如果一手太貴,咁你一個月有無$5000剩? 如果有可以月供。另外我話一年後你蝕錢,問我攞番。

結果,有一個同學係 $125 買左一手,賺埋5-6蚊息。有一個女仔,月供成本大約 $130。佢地兩個都請左我食飯。另外兩個同學,一個 $130時話貴、等$120先、而家$140、話等番$130。不如等匯豐就o黎破產先好唔好? Last一個見當時市道旺,儲錢等股災先掃貨。匯豐expected PE 12倍,中移動15倍,不如等下有無多次911仲好啦。

Monday, August 14, 2006

問世間「情」是何物

每逢暑假,都會出現一個怪現象,就係大批成年人係d書局門口大排長龍。尤其係星期六、日,特長。難得d家長放假,卻無得休息,由書局內排到出街外。

中午時份,烈日當空,為嘅係咩? 為嘅係希望自己仔女係來緊一年開學有齊課本,等佢地唔使比老師鬧,全副裝備去上堂。但又有幾多仔女感覺到o黎份情? 你有你排,我有我去唱K、漫畫展、online games......


養兒一百歲,長憂九十九。唔係齋講買書嘅事,而係我地做人仔女嘅,好多時忽略父母對我地做左嘅野。

註: 今年會考共產生20,300名零分生,當中6795人為日校考生,即8.9%日校考生取得零分。

Thursday, August 10, 2006

CK 拖鞋

相信有好多人細個都著過o黎種拖鞋,特別係男仔。o黎對拖鞋,真係頂級、超卓,神奇。因為o黎對十幾蚊嘅鞋可以用來出席唔同嘅場合。係我地細個時,好多時著o黎幫呀媽落街買野。除左用o黎落一落街,著o黎同d屋村朋友仔打籃球又得、踢波亦得,得左。我周不時都係因為咁,鞋面其中一邊會斷左,跟住就比呀媽鬧,因為又要買個對。

人大個左,轉左去著 d 人字拖,貪佢好睇掛。諗番起細個o既時候,人簡單d,無拘無束,一對拖鞋走天涯。依家唔係lor,又要注重外表,又要貪靚,d 鞋出街一對、皮鞋一對、打籃球又一對......咪就係咁先之有波鞋街之麻。

Monday, August 07, 2006

Area of Exculsion

每個人都有一個屬於自已的空間,可以放低所有o既野,與世隔絕,靜靜咁想下我自己o既事,懷念下自己o既過去。你o既空間可以係你間房、可以係一有心事就去o既海邊,又或者係馬桶之上。

而我,近來多了一個新地方。有時我會睇完神鵰,落樓坐係入面,關上門,剎那間整個世界都靜下來。按下音樂鍵,閉上眼睛,回到我的過去,思考將來的路。

管它o聽日又有幾多個症要睇,聽埋o黎首先講。依斬走走枉枉滴等......

Saturday, August 05, 2006

對與錯

愛情」 - 我不懂太多,但有一點可以肯定,愛情無對與錯,只有愛與不愛。

當某一方要離開,傷心的一方自然認為對方錯; 但對方係唔會理會,因為佢覺得自己o既決定正確。

不愛就是不愛,什麼祝你幸福、我會繼續等你,再見亦是朋友等全是廢話。Who fxcking cares?

Tuesday, August 01, 2006

你瘦了

上次游水,唔知係好耐無見,定係你真係 -- 瘦了。

中四符轆入左 4E,認識o左你,你比我o既感覺係一個堅強、勤力、瀟灑o既男仔。考試考第一、英文好,又多老師鍾意o既人。Form 4, form 5, form 6, form 7...... 一路都無變。記得有個英文老師同我講過,「你瀟灑d啦,做男仔最緊要瀟灑。」我相信大家都希望見你堅強,瀟灑的一面。

PS:
快d醫好d皮膚佢,一齊去打波啦, 打波可以練大隻d,大家都話要挑你。
我以前好似瘦過你嫁喎!

Saturday, July 29, 2006

型男廚房,食左先講

今日同幾位老朋友到火炭津津食野,都幾好食。我食野厭尖好多人都知嫁啦,我都話好食o既,都真係唔錯。

友人麥記閒時推介o下有咩地方有好野食,不過全部都係 d 大商場入面,ABM、朗豪芒咁。一塊扒兩夠幾水,其中一百蚊係比租、裝修,食完唔好食都話好食啦。去o黎d地方食野,潮d掛。

o拿,等我又講下有咩地方 d 野食啦。不要問,只要信,食左先講。

1. 大圍顯徑,消防局對面第一間 -- 潮州打冷
2. 鳳皇村明記、新蒲崗成記 -- 牛什粉麵
3. 尖咀樂道,澳門茶餐廳 -- 沙爹牛麵
4. 大圍火車站馬會對面 -- 松記糖水
5. 馬鞍山新港城街市 -- 車仔麵
6. 翠華 -- 凍0茶

絕對唔係食裝修,識食之人先去。周不時有好多寶馬、病屎泊係果 d鋪頭出面嫁。

Saturday, July 22, 2006

你點知?

前幾日知道有個舊同學係外國番左o黎香港。中四、中五o既佢,係傻仔一名,同我一齊去機鋪、波樓、打牌。佢會考考唔倒,好失望,去左第二間中學repeat,輾轉間去左美國番學,今次番返來只係探下親人、朋友。佢話佢好enjoy 係美國o既生活,上午做 part-time,下午去U讀 account。有條女,又渣車,入籍埋美國,應該唔會再返o黎香港。

我都登佢高興,心諗如果佢係香港,會唔會有咁o既生活呢? 我想講o既係,有好多野你係唔知嫁。我地o黎 d港燦考左CE、過左AL,大學畢業咁又點? o黎個世界咁大,有咁多野,人生中有咁多你遇到o既人,你控制得幾多? 你知將來會點咩?

近來身邊有幾位朋友,因唔同o既事,令佢地唔開心,係到希望佢地明白,世事無常,who knows? 你今日遇到o既野,未必唔係好事。多關心你現在擁有o既野啦 -- 你o既家人,你o既老友記。

Wednesday, July 19, 2006

地產演譯員

今朝聽到新聞,話依家地產市道差,又近收樓期,市場擔心會引發撻訂潮。之次後就訪問一個中原o既地產董事,佢條粉腸話喎,如果d 業主肯蝕讓 5- 8%,市場一定會有人承接,唔擔心有撻訂潮。

佢老味,見人講人話,見鬼講鬼話。市度好就叫人買樓、抄樓。「拿,陳生,依家市度咁好,買層樓o黎投資啦,o黎個映班園,一個月升十零個巴仙,無問題啦,到時轉手記緊搵番我呀。」好啦,依家就話,「陳生,依家市度唔好,如果你真係負擔唔度,唔好上會啦,你肯cut10%,我盡幫你搵客。」cut一成咪等於輸曬lor。好一個地產佬,過左海就係神仙,我覺得佢地重叻過股票演譯員。

Tuesday, July 04, 2006

八成半身家

o黎個月,有好多男仕只做三樣野 -- 返工、睇波、訓。寫 blog? 有idea,都無力寫。難得一連兩日有時間,就寫下慈神啦。

股神巴菲特剛宣佈捐出八成半身家做慈善,合供三千億港紙。睇o左o黎個報導,就更加覺得自己供養小朋友係正確。雖然自己付出果d係蚊比同牛比,但自己亦希望可以繼續學習股神做人處事o既態度。

捐八成半身家出身o黎,有邊個做得到? 唔好話八成半,一成半都已經好肉痛吧? 當然股神剩低o既一成半身家已經有530億,上曬岸。相反有d人標榜自己搵大巴錢,但係慳都你唔信,表面風光、內裏縮骨。真係想嘔!

之前已經講過點解要先幫中國小朋友,而今次我特別要求宣明會要係助養女仔。唔好以為我有特別辟好,而係我睇左「人間蒸發」,劇入面o既女仔好慘,所以希望幫d女仔先。有朝一日,我自己上曬岸,希望捐一成半身家比有需要o既人啦。

Monday, July 03, 2006

一分耕云,一分收獲

「一分耕云,一分收獲。」係我非常同意之事。要有回報,一定要有相等的付出,o黎個咪係鋼之鍊金術師o既重點??

有好多人會以為我今天得到o既野,係屋企比我o既,我不得不承認家人打本比我,但賺回來的全是經自己手得來的。

我付出了什麼? 當人地星期六、日去行街、睇戲、食飯、拍拖之時,我好多時都係家中看報紙、睇財經透視等。富爸爸的書,我買了3本,在圖書館看了5本。近一年的信報月刊,我都睇過。近半年的信報,九成都睇左,咁你話 d 錢係唔係天跌落o黎呢?

而得到的同時,我亦學識o左回饋社會。家中o既金錢大部份係大陸賺到,所以我已決定助養中國大陸的小朋友,令佢地有書讀,所謂「長貧難顧」,唯教育可令他們脫貧。依家可能助養一個,希望將來做倒生意有固定收入,助養多幾個。要付出先有回報,唔係只係講你努力搵銀; 你今天幫助有需要的人,他日可能有你會得到更多。