World Cup

又到四年一度o既世界杯啦，我自己其實無邊隊特別支持，雖然我好鍾意利記，但我一 d 都唔支持英格蘭。有位網友同我一樣，佢希望英軍早 d 出局，等利記 d 球員早 d 休息，唔好傷，真係講得好!

世界杯一到，電視節目一定會重溫歷屆世界杯o既片段，剛睇o左有線播番 98 年法國奪得世界杯片段，杜林o既犯錯，之後佢入番兩球補數，Zidane個禿頭決賽頂入兩球，帶比大家美麗回憶。而我同時又會諗番起當年o既自己，98年o既我係到做緊咩呢?

98年，98年......我諗起我係一個剛考完會考的黃毛小子。 八年，咁就八年。我係o黎八年過成點呢?來緊o既八年我又會係點呢? d 咁o既問題不斷係腦海中到轉。係唔係只係希望將部 C 仔轉部 E 仔就係目標呢?世界杯，不論你鐘唔鐘意睇波，你都會發覺佢帶比你興奮、感慨o既回憶。