回到過去

哭

2008-05-21T22:43:00.002+08:00

5月19日下午2:28pm, 全國人民為四川災民默袞。我在公司二樓，站在電視機前跟隨。默袞時，我沒有哭。但當電視影到成都及天安門廣場有民眾默袞後，未有離開，一起高叫中國挺住、四川挺住、中國加油、四川加油等，眼淚突然一湧而出。

曾經為過家人流淚、為過感情流淚，為國家流淚是第一次。那種流淚很特別，你不會哭出聲，但眼淚自自然然從眼中落到臉頰上。那是愛國、悲傷、激動的一種混合吧。我很高興自己是中國人，將來我一定會回報中國。

又黎?

2008-05-15T00:01:00.003+08:00

點解會係咁? 今年中國流年不利嗎?
死唔難過，只是一剎那的痛苦，留下來的親人才最痛。我捐果一千幾百比d小朋友讀書，而家唔好話讀書，命都無埋，仲可以追求什麼?

我無咩可以做，只有兩樣。1) 去拜神 2) 捐錢
所以決定今個月去一次黃大仙。捐錢由下列方法抽出:
1) 今個月唔揸車，慳油錢 $500
2) 從期權金賺左既，取出 $500
3) 自己比 $500
共$1500捐去紅十字會。

承諾

2008-04-24T23:45:00.002+08:00

在我事業最低迷的時候(大概半年前左右吧)，我去過黃大仙拜神，我又同自己講，有一日公司有錢賺(exclusion of depreciation)，就算是一蚊，我都會助養多一個小朋友。

可能是感動了上天吧，今個月要打電話去宣明會了。賺長者服務o既錢，幫助中國小朋友，一代助一代，我想不到有其他更好的組合。

蒲公英的約定
將願望折紙飛機寄成信　因為我們等不到那流星認真投決定命運的硬幣　卻不知道到底能去哪裡

小巴佬與的士佬

2008-04-03T23:10:00.005+08:00

我搭車最怕小巴佬，揸車最憎的士佬。

由於上班關係，差不多日日都坐小巴，不知大家有沒有留意，d 小巴佬態度差到不得了。

1) 飛站 - 多車係巴士站，佢一定行外線，以為你睇唔到。
2) 有老人痴呆症，你叫o左有落，一分唔夠佢可以唔記得。
3) 分段收費，永遠唔記得改機。
4) chok 車，係咁大力比油，又剎停。賽緊車咩?
所以我真係怕o左佢地，除了快之外，我想唔到原因要搭佢。

當揸車o既時候，我又好Q憎d的士佬。大佬，你搵食姐，唔係大晒呀? 有客，dup 停。行要行先，讓一定唔讓你，成日boot你，真係吹Q漲。

如何可以不理它

2008-03-21T00:32:00.006+08:00

近來真係有得震，無得訓。不斷要換馬，掃貨，唔對路，斬! 愛股玖龍一樣要放。

明明換o左d好股，一樣跌。PEG <1, 跌; embedded value <3, 跌; 業績好，一樣跌。依定好明顯係一個價值投資o既時間，你挨得過，可以唔理佢，之後一定會發達。

利是不利是

2008-02-12T00:00:00.001+08:00

今年過年，有少少不習慣。以往過年時，我只會收利是及逗利是，但係估唔到有很多人 expect 我會派利是。原因係話我係老闆喎。

我唔係話慳果幾十蚊，但我就覺得好怪，一來我是未婚，二來我又不是年紀大過他們，我係好傳統的，點解要我派? 結果用公司名義，交給 partner 派比d姐姐。樓下報紙婆給了$50比佢買野食，送貨o既比tips 佢地。朋友o既請飲茶食飯，買賀年禮品送之。加加埋埋同真係派利是o既大人差不多，左手入右手出，哈哈。

我不嬲都話有錢大晒

2008-01-15T00:27:00.000+08:00

拿! 人地揸架Ferrari, 踩114又係$450,扣三分。我d雞精踩七十幾，係西沙路比人捉到，又係$450, 扣三分。o黎d就係窮人同有錢的分別。

百億富豪林建岳涉嫌超速駕駛案出現戲劇性發展，他本被控超速64公里，但一直否認控罪，並聘請重量級大狀和專家抗辯。前日案件審訊期間，控方突改控他超速29公里，由本來一旦罪成可能停牌，變成只扣3分罰款450元。政府「放生」林建岳，法律界、議員嘩然，有指是當局向有錢人「跪低」。

林建岳原被控於去年4月5日，駕駛其價值200多萬元的599 F1紅色法拉利跑車，在北大嶼山路近青衣線限速50公里的路段，以時速114公里行駛。案件本周一在荃灣裁判法院開審，由多名保鑣陪同到庭的林建岳否認控罪，並聘用著名資深大律師胡漢清代表抗辯，又準備請英國專家挑戰警方偵測車速雷射槍的準確性。據知，林建岳為這宗官司單是支付律師費已達150萬元。

案件審訊至前日第四日，控方向法庭申請將傳票的114公里車速，修訂為79公里；因林建岳曾堅稱當時車速不超過80公里，控方修改控罪後他改為認罪。根據現行法例，超速45公里罪成須停牌6個月，但若超速不過30公里，只須被定額罰款450元及扣3分。

律政司發言人昨日下午回應表示不評論個別案件，但一向按案件證據來衡量處理。對於林建岳的超速里數前後竟出現35公里差距。有交通部警官估計，控辯雙方就案件達成協議，改控較輕罪名換取被告認罪，這種做法在刑事案中常見，但交通違例或超速案件則十分罕見，更承認此案的結果給普羅大眾「有錢大晒」的感覺。

我o地要學o既唔係批評政府，唔係怨天怨地怨唔公平，而係學下點樣有百億身家。

球隊倒影

2008-01-09T00:11:00.001+08:00

早在一年多前看了經濟日報星期六波經的一篇文章，作者講到每個球迷鍾意佢隊波，其實係反映o左佢內心o既世界。姐係話，佢鍾意邊一隊，係可以知道佢個人性格係點。

舉幾個例，鍾意曼魚者，係愛佢長勝o既感覺，一路飲汽水，一路食花生，入波咩，拍拍手。他們喜歡勝利，不理會過程，快樂建築在贏對手身上。

鍾意阿仙奴者，他們喜愛華麗及悅目o既感覺，熱愛比人讚，享受過程大于結果。

鍾意利記者，係他們內心有一份期待。失敗了多年，希望有一天可以重拾光輝，戰勝一切，取得勝利。那請不要問我為何利物蒲踢得咁差你都鍾意了。

過去一年的體驗

2007-12-26T01:39:00.000+08:00

上次停 blog, 正是上年的聖誕節前，近一年可算是一生中重要的一年。反正聖誕節對我這個沒女友，沒假期之分的人並不是很重要，留在家中寫晒我沒時間寫的事。

1. 停blog係因為上年我由一個打工仔，開始成立自己的公司。壓力、辛苦、生病令我不能再寫。現在慢慢上軌道，才可放鬆少少。

2. 有一天有一個朋友問我:「你為什麼那麼想搵錢?搵那麼多錢做什麼?」我想了想，答不出來，我說:「我都不知道。」直到近來我才想通了，我係想做一把傘，為家人檔風檔雨，令他們不會因為沒錢而得不到可做的事，例如留學讀書，睇醫生咁。你話我唔愛揸靚車、買靚野，食好野就係呃人o既。不過對比他們，我要什麼都不重要。

3. 人們說，當你要得到一些時，你可能要失去一些，我從前係想唔明的，為什麼不可以是 win-win。但現在體驗了，近一年錢是搵到些，生意經驗是得到了; 得來是家人見少了，病痛多了。我想解決方法只有兩個，一是不用搵食，二是上天給我一天48小時，比你選，你會點選?

黑色十二月

2007-12-17T23:58:00.000+08:00

不是說聖誕是白色的嗎，為何這個十二月對我來說都是黑色?

1) 12月1日，吃了可能是世界上最貴的牛肉乾。

2) 12月大傷風了一個星期。

3) 抽新股，潛水；按o左股票去入#941，再潛。

4) 又輸比死人曼魚。

看來要到黃大仙拜一拜先得，唉......

越快樂，越大獲

2007-11-27T00:21:00.000+08:00

本來我好高興及期待係聖誕節之前同朋友開開心心咁睇黃子華。但係星期六開NOW TV 睇英超，個廣告話「12月16日雙紅會，究竟邊隧會勝出?」我心一沈，16 號? 不是去看黃子華嗎? 拿飛一看? 吊......真係一盤冰水照頭淋。我點解明知12月係打曼魚，買飛前都唔check左先。

依家一係比人睇，一係網上邊賣o左佢。網上面想賣的人很多，不用擔心放唔到，個問題係我想係第二日睇的話，要上網買黃牛，$280既賣到$400一張，真係激死。個心情就係好似你攞o左大假plan好去旅行，團都報埋，突然發覺有d野令你去唔到，心情係由高點跌落低點。點解我會咁白痴?我明顯係越快樂越大獲。

電視劇

2007-11-21T23:33:00.000+08:00

近幾年來講，都無咩係追開o既電視戲。如果要數，都只係有長命劇ER.

有好多身邊o既人，睇下睇下都無睇了，一來工作忙，一來話好悶，女仔就話無o左有型，又叻o既Carter. 其實你問我睇咩，追咩，我又答唔出。

可能只係情意結啦，做開這行，睇多d，自己覺pro d。你話睇靚女咩? 數埋得個 Neela, 係電影「我愛碧咸」時覺得佢好cute, 依家見到有一種成熟o既女人味係到。所以每個星期都抽時間睇o左佢，不過多數都係bt之後睇番。

做人難，請人更難

2007-11-04T23:11:00.000+08:00

做我們這一行，要請d阿姐照顧老人家。早幾年黎講，六千、六千幾都有人做，今時今日，要比接近七千銀，先有人見下工。

好啦，有人肯做，人工比高o左都唔係一定有好阿姐。請著d懶散o既，叫佢做下野咩，佢對番你黑面，話佢兩句，又驚佢話聽日唔做。

咁都未算，比左d新人高人工，一路做開好o既姐姐，就會唔高興，知道出邊市道好，又想轉去其他院。點搞好? 唯有加佢o地人工，留住佢地，有時請佢地食下野，氹下佢o地。咁搞法，無他，當d阿姐有十個，買隻國企，一年唔使賺十個，佢o地話做咩鬼姐，一年做埋都無十個啦。唉......

一個漁人的故事

2007-10-21T22:53:00.000+08:00

某日，一位旅客來到海濱遊覽。他看見一艘漁船停在金色的沙灘上，船上有幾條大金槍魚，一個漁夫正在陽光下睡覺。

他走過去問漁夫:「捉這些美味的魚要多少時間?」

漁夫:「要不了多少時間。」

旅客:「那為什麼不捕多一些去賣? 剩下時間你做什麼?」

漁夫:「魚夠吃便可，有時間我會陪我的妻子和孩子，晚上和朋友一起吃飯，生活愉快。」

旅客:「如果你懂工商管理，你應該花多些時間捉魚，賺錢買一艘大船，再捉更多的魚，然後買多幾艘船，組織一支船隊。那你再不必打魚，自己做批發、零售，便可賺更多錢。之後再將公司上市，你會變成千萬富翁。」

漁夫問:「但這樣要花多少時間? 千萬富翁......然後呢?」

旅客答:「大約要十至二十年，之後你便可退休，每天懶洋洋地睡覺，陪孩子玩，和朋友一起晚餐，你會很快樂。」

漁夫:「我現在不是這樣做嗎?」

幾年前，我是歲月風云中的危天行，創世紀中的葉榮添，咩都要嬴，錢要搵得多。因為失敗過，被人睇死過，不知不覺間變成這樣。那幾年，壓力得很。直至這年看多了林先生的文章，加上病痛多o左，才懂得放開、懂滿足，懂尋找快樂的足跡。

Ideal 退休生活(二)

2007-10-17T22:51:00.001+08:00

上一次已經講o左，我心目中o既dream house係點，今次講下我退休會做d咩。

星期一至五係大陸，會早上六點起身，做45分鐘帶氧運動。如太極、游水，行山咁。之後沖涼、飲下茶、食早餐，睇報紙。然後就會睇書，聽下收音機，聽下財經新聞咁。到12點鍾，午睡番兩個鐘，老人家嘛。訓醒之後同老婆去行下街、飲下午茶，買下餸咁。晚上會睇新聞、坐係按摩椅上睇碟、聽音樂，睇下後生時o既相，十點就訓。

星期六、日方面，一日會去探呀爸呀媽，一日會渣部M3番落香港探下 d 孫仔孫女，同埋睇波。如果係假期，就會約老朋友上o黎，燒下野食，打下 snooker 咁。生活費方面，我 expect 靠股息已經足夠，加埋做下d定期咁，唔使炒來炒去。醫療方面就靠保險cover.

看似好簡單o既生活，不過如果做到，已經好快樂了，人生短暫，可以追求得幾多?

Ideal 退休生活(一)

2007-10-09T00:26:00.001+08:00

不知大家有沒有想過退休後的生活如何? 而我一早就想好左退休後的生活點安排。第一樣要講o既係居所。

退休後我會係大陸，如廣州、東莞，深圳買一層雅居樂或碧桂園，一定要係獨立屋的。屋外有一個花園，最好有個泳池添。花園邊有兩個車位，一個放了BWM M3(中港牌)，另一部係豐田大霸王，這種才是顧家得黎又擘得的男人。

地下是大廳、飯廳、廚房及一個細BAR。一樓係睡房、客房及一個書房。走進書房會有十本一生之中最愛o既書用玻璃櫃掛在牆上，其中三本已經定好左。

二樓會有一間英式桌球房，旁邊會有一個雪櫃放凍飲，坐位上有指甲鉗，用來比對手之用。桌球房旁是一個視聽室音響室，可以係到睇碟，聽歌，房中有一張按摩椅，地上放一部 PS 8，入面係Winning 33。再過係一間不可缺少o既麻雀房。

天台設有BBQ，另有一個間房，頂是用玻璃做的，房中有床一張，晚上可躺下看星空。

我唔係發白日夢o既，我係有信心擁有我o既dream house, 所以依家都持有3983同2007 既IPO, 要買退休o既dream house 先會放。

Things I want to eat

2007-10-03T23:47:00.001+08:00

近幾個月來因為胃病可以話無啖好食，依家距離解放還有幾個星期，我諗定要食d咩慶祝下。

1. 辣魚蛋
2. 鳳皇村明記牛腩河
3. 出前一丁公仔麵
4. 一罐冰凍可樂
5. 凍0茶
6. 熱浪薯片
7. 麥記雞腿包餐

不過樣樣食多次之後，就會大幅減少再吃。因為經過今次一病，真係明白健康o既重要性，搵幾多，但食唔到，訓唔到，做人有咩意思?

孖孖鋪

2007-09-28T00:13:00.000+08:00

不時有d識我唔係好耐o既朋友稱呼我二世祖，少爺仔。又好難怪佢地，不竟他們認識我唔深。

可能好多人細過o既時候都試過孖鋪，但係我試得最多o既係孖孖鋪。個時我出世，一家三口係住旺角道，砵蘭街交界，三個人一張床。到我大細佬出世，四個人訓一張，孖孖鋪，十分溫馨。直到小一，才搬到龍蟠苑住。當時阿爸阿媽要番工，係自己坐地鐵番學放學，食飯就自己洗d米，焗熱d隔夜餸食。咁你話我細個時係唔係有阿四服侍，嬌生慣養o既少爺仔呢?

老曹話齋:「唔理你點樣成功，點樣努力，係別人見中，你都係一名敗家仔，此乃窮人o既仇視心態。」所以我都唔介意人o地點睇自己，點叫我都係一句姐，從Intergrated, 到Preferred,再到Prestige，都係要由努力，遠見換取番黎o既。

Seeking you

2007-09-21T00:12:00.000+08:00

As Sandee called me to post some criterias, I try to make some here.

年齡: 22-26

樣貌: Stephy, 孫藝珍, 小龍女

興趣: 不要只是行街、睇戲、食飯，要懂運動

加減分事項:
1. 識煮飯加 10 分
2. 鍾意利記加 5 分，曼魚者減5分
3. 食煙減20分

成功介紹者，我阿爸阿媽保證送留番一兩手人壽比你。不過我應該發夢先遇到。

我的好書

2007-09-12T21:23:00.000+08:00

我有幾本書推介比大家(排名不分先後)，都係我近年來最愛。

1. 中華書局出o既「股市全攻略」 -- 本書係我第一本睇o既股票書。佢由最基本講咩係股票，咩係藍籌、國企，紅籌等。對於初哥o黎講係好好，唔係你連隻股係做咩都唔知，又點投資。

2. 金錢之王 -- 由蔡東豪訪問幾位投資高手所成寫的。講述他們的想法、生活及遠見，其中看到惠理基金創辦人葉維義對生活的執著，令我十分敬佩。六點鐘食飯就係六點鐘全家人坐晒係到!

3. 富爸爸，窮爸爸 -- 我識好多人雖然都看過這書，但係佢地覺得所講o既野好大路，得個講字。我認為佢地未明白窮人和富人之間的關係，我建議你地工作o左幾年後，再看一次，領悟多一次。

4. 證券分析與實踐、平民資本家 -- 林森池先生所寫o黎兩本書唔使講，係可以令你發達o既書。

5. Tuesday with Morrie -- 人生、家人、愛情，友情究竟係咩呢? 係到你會得到。睇得多投資o既書都要睇 d對人生有幫助o既書，唔係的話我o地只係金錢o既奴隸。

有睇過以上d書o既朋友不妨交流一下。

See you in Anfield

2007-09-04T22:52:00.000+08:00

今晚忙中抽空向我的朋友道別，要下年才可再打波了。

明天要走機場一轉，所以星期一那那聲攞部車去整，確保明晚可以用，不要到時熱親大帝，在prioirty pass 說唔舒服。明天本來要照胃鏡，反正無保險比，不留院了，人生有幾多位朋友值得你車他去機場。不過下年番黎，可能車唔到你了，怕到時換了 SL55 AMG。可以的話11月 see you in Anfield, 如果唔得，都希望5月到來，順便慶祝聯賽冠軍都好。

PS: 你支咩值四百幾既腳架?

停牌

2006-12-13T00:04:00.000+08:00

莫杰士丹尼向各位網友申請停牌，消息人事指可能涉及重大收購。

其實係因為本人工作繁忙，沒有時間寫新嘅文章，唯有暫停，我亦希望有一天會重開，但短期內應該唔會。而我有時間的話，都會繼續睇大家嘅文章，向大家留言。

每個故事都有終結的一日，正如我喜歡嘅夜神月亦已經死去一樣，我的過去亦回顧得差不多，人是要面對將來嘛。開blog大半年來，除左令自己反思之外，亦已經向大家學習了，得益不少。

最後祝大家聖誕及新年快樂! 投資嘅繼續搵多d、玩車嘅換新車、女士們放假大把人追。

搵食姐

2006-12-01T00:09:00.000+08:00

最近網友巔巔講番佢做學生時被老師罰抄書的經歷，真係搞笑。不禁令我諗番起，我都有被中文 miss 罰過，我果時會一次揸兩支鉛筆，兩行一齊寫，咁就會寫少一半，但係其實只係慳咗時間，氣力付出方面都係差不多，因為要一次控制兩支筆，手力自然要多咗。

我自己被人罰就好少，其實我多數係幫同學抄，收費方便自然按字數而定啦，中間價係$5。接黎d job 真係好大風險嫁，因為你幫佢抄得黎，又要似佢d字跡，唔係被miss發覺就一獲熟。所以作為「保薦人」，我都會誠諾，過唔到骨，係唔收費嘅。但係這種不竟是高風險，低回報嘅搵食方法，所以我開拓一條新路，就係賣數學練習答案。

以前嘅數學練習，多數唔會有答案跟，所以係無答案抄。於是我就自己做完，攞去賣。反正d練習都要做，而且我細個數學計得快，返屋企第一時間做數，然後就打電話去推銷。通常係$3一個練習，實行薄利多銷!你知啦，小學最煩係計d分數加減，仲要唔同分母果種，同學仔見好晒時間，多數幫襯。而佢地都會好醒目咁錯番一兩條，唔好有尾巴比miss捉到。

為咩我要幫同學抄野，賣答案? 都係為搵食姐。當時家圖四壁，零用錢一個星期5蚊，唔搵番d收入點得喎。所以我除咗抄書、賣答案、仲有做速遞(幫同學由五樓走到地下買野食、再送回)、炒閃卡，總之做多幾飯，搵多幾個錢落袋，有野想買都可以靠自己麻。

Holapians are always tough and harmonious

2006-11-21T23:03:00.000+08:00

在此看見她走過自己的路，卻未能完成。
留下了一句祝福說話，下次都也做可立女啊!
You will never walk alone.

楓

歌手：周杰倫作曲：周杰倫填詞：宋健彰(彈頭) 編曲：鍾興民

烏雲在我們心裡擱下一塊陰影，我聆聽沉寂已久的心情
清晰透明，就像美麗的風景，總在回憶裡才看的清

被傷透的心能不能夠繼續愛我，我用力牽起沒溫度的雙手
過往溫柔已經被時間上鎖，只剩揮散不去的難過

緩緩飄落的楓葉像思念，我點燃燭火溫暖歲末的秋天
極光掠奪天邊，北風掠過想你的容顏
我把愛燒成了落葉，卻換不回熟悉的那張臉

緩緩飄落的楓葉像思念，為何挽回要趕在冬天來之前
愛你穿越時間，兩行來自秋末的眼淚
讓愛滲透了地面，我要的只是你在我身邊

幸福並不是必然

2006-11-20T23:17:00.000+08:00

近來看報紙都無睇到港聞版，有時草草睇下財經版便算。今晚和朋友通電話，先知到我們有一位小師妹不幸地在一件倫常慘劇中去逝。這位小師妹我雖然不認識，但她是中七的話，我們便一起生活過，為什麼上天選擇了她?

幸福肯定不是必然的。抽中一手招行，幾個月升一倍，幸福; 一家人快快樂樂生活，放假去一轉日本旅行，幸福。但係我地好多時都唔能夠珍惜這一齊，唔滿意黎樣，唔滿意果樣，彷彿要全世界都合自己意。但有沒有想過，身邊有人可以一夜間失去一切。

當大家可以有閒錢炒下股票、可以買化妝品扮靚靚、可以駕駛著心愛座駕吹吹風，其實已經好幸福。珍惜眼睛的一齊，珍惜眼前人! 希望大家都不要說愛得太遲。最後，向小師妹你送上最後的祝福。

如果有可立中學師弟妹，知道他們要經濟上幫忙，請留言給我。

話當年(二)之00年

2006-11-14T17:51:00.000+08:00

出第二篇嘅時間真係剛剛好，而家好多C9,之前睇住個市乾升，忍唔住手，要追番貨喎。萬七點唔買，升到上萬九點，話無晒阻力，回番落幾百點話平，真係吹漲。

談到2000年，科網潮，我讀緊中六。記得果時HK.com同tom.com上市，身邊好多同學剛好年滿18歲，當然要用黎抽IPO啦。如果係網頁登記用戶，好似可以易抽中d。Tom仔由一蚊升到上八蚊，HK仔都升左兩倍，大家都諗原來一到18歲賺錢就咁易。

好彩嘅係，佢地都係學生，抽到嘅，賺幾千蚊就快放，唔會上market到攞貨。有d用白表抽，走唔切嘅，將張股票做牆紙，貼幾年，蝕極有個譜，唔會好似好多人咁比隻八號仔玩死。而我? 仙都唔仙下，求老豆買左人生中第一部電腦，申請埋56K上網玩唉屍蕉，已經好開心。果時只係幫阿媽填表抽左三手地鐵，而我自己第一次買嘅股票係科網爆煲之後既#2388。d人問我，做咩仲敢買股票，我話我都未買過，銀行股點解唔敢買呀? 所以當而家火紅火綠嘅時候，都係小心d好。

話當年(一) 之97年

2006-11-01T00:17:00.000+08:00

近來有好多C9、網友，財經演員都話股市有泡沫，小心股災，我聽左之後成個人定晒。因為我眼見同我記憶中比較，仲有一段距離。

談到97年，我仲係一個中四學生，少不更事。記得有個星期日一家人到樓下屋苑商場飲茶，十年前假期去飲茶，一定要等位同搭枱嘅。話說果時市旺，我阿爸和同枱兩公婆(同屋苑、全職抄樓、收租)講開我們間居屋售價，我地話係A座500尺。佢地開價三球二，問我地放唔放，賣左比佢地，佢地租番比我一家住，萬一蚊個月。

我老豆話考慮下先，佢地比左幾個電話我地，驚死搵唔到佢地。我老豆初初聽到心郁郁想賣嫁，三球喎! 但係我同佢講，賣左我地一家無瓦傘頭，要寄人籬下嫁。比我講左一講，結果我老豆都係無賣到，我對於黎件事耿耿於懷。老豆，我欠你兩球，會幫你搵番黎嫁! 家下d酒樓接下一間又一間，至於果兩公婆，之後都無係酒樓見過佢地...

我的投資室

2006-10-20T21:43:00.000+08:00

如果有人問我點樣選股，點樣決定投唔投資某間公司的話。我會答: 其實很簡單，要一本公司年報、一本筆記簿、一枝筆及一部計算機。投資就是這麼簡單及苦悶...(當然背後要有足夠會計知識，同埋之前交左嘅學費。)

PS: 總於轉左去beta version, 好似好用左，唔知大家覺得點?

從中國教育看中國社會

2006-10-10T18:09:00.000+08:00

中國政府想推行教育改革多年，要協助窮學生讀書，但係點解搞來搞去都仲有咁多文盲，仲有咁多人無書讀呢? 點解唔好似香港咁，實行全國九年免費教育? 唔係呀化? 中國人口咁多，九年免費教育，邊到搵咁多錢?

錯! 中國現時有1.1億學生，假如每年要津貼每一名學生$1000，一年要用1100億。千幾億喎?? 中國石油(857)截止06年6月半年賺800億，當佢全年賺1600億。由佢interim見到，中石油只發行約12%股份，其餘88%都係阿爺到，1600x88%，阿爺淨袋1400億。一年用千零億去搞教育，實在係濕濕碎，唔會醉，一間公司夠啅。但係撥1000億出去，有幾多落去d小朋友到呢? 省政府貪d、市委攞d、村長要d，校長都可能分d...由此可見，中國並唔係無錢，而係佢都明白貪污仲係嚴重，唔可以話搞就搞。故中國政府亦唯有鼓勵外間嘅NGO幫手。

所以，我希望在過去幾年有份係中資三鬼(857, 941, 2628)，賺左唔少錢嘅人，想想你d錢係邊到賺番黎? 想想祖國嘅小朋友，有機會不防回饋番社會。

識洗錢>識搵錢>識慳錢

2006-10-04T18:58:00.000+08:00

識洗錢嘅人最叻，因為佢地洗得起錢，必然搵得到(碌爆卡個個月只還息個d另計)。而話明係識洗錢，佢地係懂得去洗，而唔係亂洗一通，所以佢地排第一。

而只懂搵錢嘅人排第二。係呀，佢地係搵到下錢呀，但係一年都去唔到一次旅行，買野買A貨，充大頭鬼。搵到錢又唔識洗，搵黎做咩? 財爺都講過啦，搵幾多唔係你嘅，用幾多先係自己嘅。

日日晒時間去諗下點慳錢個d人最笨。我細細個老豆就教我，唔好諗下點樣去慳錢，諗下點樣去搵錢，慳慳埋埋，慳得幾多，一個唔覺意有場大病，慳埋唔夠睇醫生。

所以我努力由第三種人做起，希望有一日變做第一種人啦。
PS: 相片來自國內同胞的blog http://www.cnblogs.com/bluehat/archive/2005/06/24/180216.html

M巾之謎

2006-09-23T01:03:00.000+08:00

其實之前諗過出唔出o黎篇文章，因為有d尷尬。但最後都係基於好奇心，同埋佢實在太勁啦，連老闆都要買番公司股票，所以我忍唔住要post一下。

恆安國際(1044)公布，截至今年6月底止半年業績，純利3.3億元，升62%，每股基本盈利0.3元。期內，營業額升20億元，經營溢利4.5億元。講番公司背景 - 集團主要業務為在中國生產，分銷及銷售個人衛生用品包括衛生巾、一次性紙尿褲、紙巾及潔膚護膚產品，其中M巾佔七成。

集團業績理想，主要由於三大業務包括紙巾、一次性紙尿褲，及衛生巾產品業務營業額均持續增長所致。雖然上半年原材料價格持續上漲，但集團透過推出較高毛利率產品，及成本控制措施，加上受惠規模效益及人民幣升值，令整體毛利率由去年同期40.6%，升至41.5%。

毛利率四成，姐係話一條M巾賣10蚊，零售商、批發商、要賺你5蚊，再打個六折，等於成本係3蚊。各位女士，不知賣衛生巾係唔係真係咁好賺呢? 睇完篇野，覺唔覺得佢地食水好深，有搵笨之嫌?

Form one仔

2006-09-14T22:55:00.000+08:00

近來早上搭車嘅時侯，見到好多好細粒嘅男仔，著住套中學校服番學。如果唔睇佢地個校章，我仲以為佢地係三、四年級d學生添。

不禁諗番起我讀中一嘅時候，我都係名付其實嘅form one仔，事關我果時真係好矮，得1.43m，排隊排第二(已行運了~)，d高年級唔叫你form one仔，咪叫你矮仔攞。

為左擺脫我中一時比人改左做姓死，我決定學打籃球，希望自己高d，唔使岳高頭望人。感謝黃大仙保佑，到中六時，我排隊排第三(尾數上)，1.76m。所以話今日唔知聽日事，切勿睇死人呀。

我是一個收集狂?

2006-09-10T22:00:00.000+08:00

我係唔係一個收集狂? 好驚老左比屋企人趕出街呀。

我的模型車車-Mercedes Benz. 08年奧運吉祥物 - 福娃

近年利物浦波衫同Season Review DVD

不過最緊要都係佢地，如果唔係老左無人養點算。 :)

Touch、接觸、鄰家的女孩

2006-09-07T22:30:00.000+08:00

今次終於決定，係網上買左一套漫畫。o黎套漫畫相信好多人都睇過，而我一共睇左三次，初中一次、大學一次，近來再睇多一次。其實想擁有o黎套好耐，但知道佢出新版之時，已經出到第5,6期，所以無買到。有一次咁橋係yahoo見有人放成套出o黎，所以就bid左佢。

喜歡o黎套漫畫除左係有安達充標準搞笑橋段外，最震撼嘅係努力向目標進發嘅弟弟和也突然死去，留下一個遺憾。哥哥達也為了達成細佬和南南嘅願望，由一個吊兒朗當嘅人變成一個可靠嘅人。當中感情表達真係好感動，所以佢係我唯一擁有之漫畫。

中銀香港

2006-09-01T00:29:00.000+08:00

莫杰士丹利表示，中銀香港(2388.HK)上半年業績表現理想，調高06-08年股盈預測9-12.5%, 並將目標價由17港元調高至18.5港元。

大莫稱，中銀香港上半年盈利達70.93億港元，高於該行預測8%，撇除物業重估及回撥因素，上半年核心盈利增長逾33%，反映淨利息收入及非利息收入增長理想，並致力控制信貸成本。故調高中銀香港06-08年股盈預測10.2%、12.5%及9.0%, 至1.34、1.37及1.4港元。

中銀股東莫杰持有中銀股份3千萬股x10(-4)次方，表示自2000年做了中銀股東，未有一刻想過沽貨，為表支持近來連阿媽都買埋。對於問及今次派高息會點用，他表示會只能換一對迫力皮...

中國女排

2006-08-26T10:20:00.000+08:00

自04年雅典奧運睇完女排決賽 - 中國對俄羅斯之後，便愛上了中國女排。所以上年同今年的世界女排大獎賽 - 香港站，我都入場支持。我諗除左皇馬、曼魚到港，可令大球場爆棚之外，都無咩體育比賽可以令紅館爆棚，氣氛一流。結果中國以3:0輕鬆擊敗俄羅斯，奪得分站冠軍。

記得04年同自己講過，08年北京奧運之前，希望自己可以達成目標之後，走到首都睇比賽。但係兩年已經過去，得番兩年，還有好多路要走。好大壓力...

4個求知; 2個投資

2006-08-20T23:05:00.000+08:00

早係一兩年前，我已經叫幾位舊同學要學習投資。所謂富者越富，因為佢地用賺番o黎嘅錢再搵錢。我絕對唔係叫佢地抄股票，而係認認真真咁去買一d可以長線揸住嘅股票。

佢地問:「咁買咩好呀?」。因為佢地都係第一次買股票，所以我叫佢地買匯豐先。我話如果一手太貴，咁你一個月有無$5000剩? 如果有可以月供。另外我話一年後你蝕錢，問我攞番。

結果，有一個同學係 $125 買左一手，賺埋5-6蚊息。有一個女仔，月供成本大約 $130。佢地兩個都請左我食飯。另外兩個同學，一個 $130時話貴、等$120先、而家$140、話等番$130。不如等匯豐就o黎破產先好唔好? Last一個見當時市道旺，儲錢等股災先掃貨。匯豐expected PE 12倍，中移動15倍，不如等下有無多次911仲好啦。

問世間「情」是何物

2006-08-14T19:51:00.000+08:00

每逢暑假，都會出現一個怪現象，就係大批成年人係d書局門口大排長龍。尤其係星期六、日，特長。難得d家長放假，卻無得休息，由書局內排到出街外。

中午時份，烈日當空，為嘅係咩? 為嘅係希望自己仔女係來緊一年開學有齊課本，等佢地唔使比老師鬧，全副裝備去上堂。但又有幾多仔女感覺到o黎份情? 你有你排，我有我去唱K、漫畫展、online games......

養兒一百歲，長憂九十九。唔係齋講買書嘅事，而係我地做人仔女嘅，好多時忽略父母對我地做左嘅野。

註: 今年會考共產生20,300名零分生，當中6795人為日校考生，即8.9％日校考生取得零分。

CK 拖鞋

2006-08-10T23:26:00.000+08:00

相信有好多人細個都著過o黎種拖鞋，特別係男仔。o黎對拖鞋，真係頂級、超卓，神奇。因為o黎對十幾蚊嘅鞋可以用來出席唔同嘅場合。係我地細個時，好多時著o黎幫呀媽落街買野。除左用o黎落一落街，著o黎同d屋村朋友仔打籃球又得、踢波亦得，得左。我周不時都係因為咁，鞋面其中一邊會斷左，跟住就比呀媽鬧，因為又要買個對。

人大個左，轉左去著 d 人字拖，貪佢好睇掛。諗番起細個o既時候，人簡單d，無拘無束，一對拖鞋走天涯。依家唔係lor，又要注重外表，又要貪靚，d 鞋出街一對、皮鞋一對、打籃球又一對......咪就係咁先之有波鞋街之麻。

Area of Exculsion

2006-08-07T19:25:00.000+08:00

每個人都有一個屬於自已的空間，可以放低所有o既野，與世隔絕，靜靜咁想下我自己o既事，懷念下自己o既過去。你o既空間可以係你間房、可以係一有心事就去o既海邊，又或者係馬桶之上。

而我，近來多了一個新地方。有時我會睇完神鵰，落樓坐係入面，關上門，剎那間整個世界都靜下來。按下音樂鍵，閉上眼睛，回到我的過去，思考將來的路。

管它o聽日又有幾多個症要睇，聽埋o黎首先講。依斬走走枉枉滴等......

對與錯

2006-08-05T13:04:00.000+08:00

「愛情」 - 我不懂太多，但有一點可以肯定，愛情無對與錯，只有愛與不愛。

當某一方要離開，傷心的一方自然認為對方錯; 但對方係唔會理會，因為佢覺得自己o既決定正確。

不愛就是不愛，什麼祝你幸福、我會繼續等你，再見亦是朋友等全是廢話。Who fxcking cares?

你瘦了

2006-08-01T00:42:00.000+08:00

上次游水，唔知係好耐無見，定係你真係 -- 瘦了。

中四符轆入左 4E，認識o左你，你比我o既感覺係一個堅強、勤力、瀟灑o既男仔。考試考第一、英文好，又多老師鍾意o既人。Form 4, form 5, form 6, form 7...... 一路都無變。記得有個英文老師同我講過，「你瀟灑d啦，做男仔最緊要瀟灑。」我相信大家都希望見你堅強，瀟灑的一面。

PS:
快d醫好d皮膚佢，一齊去打波啦，打波可以練大隻d，大家都話要挑你。
我以前好似瘦過你嫁喎!

型男廚房，食左先講

2006-07-29T18:26:00.000+08:00

今日同幾位老朋友到火炭津津食野，都幾好食。我食野厭尖好多人都知嫁啦，我都話好食o既，都真係唔錯。

友人麥記閒時推介o下有咩地方有好野食，不過全部都係 d 大商場入面，ABM、朗豪芒咁。一塊扒兩夠幾水，其中一百蚊係比租、裝修，食完唔好食都話好食啦。去o黎d地方食野，潮d掛。

o拿，等我又講下有咩地方 d 野食啦。不要問，只要信，食左先講。

1. 大圍顯徑，消防局對面第一間 -- 潮州打冷
2. 鳳皇村明記、新蒲崗成記 -- 牛什粉麵
3. 尖咀樂道，澳門茶餐廳 -- 沙爹牛麵
4. 大圍火車站馬會對面 -- 松記糖水
5. 馬鞍山新港城街市 -- 車仔麵
6. 翠華 -- 凍0茶

絕對唔係食裝修，識食之人先去。周不時有好多寶馬、病屎泊係果 d鋪頭出面嫁。

你點知?

2006-07-22T23:42:00.000+08:00

前幾日知道有個舊同學係外國番左o黎香港。中四、中五o既佢，係傻仔一名，同我一齊去機鋪、波樓、打牌。佢會考考唔倒，好失望，去左第二間中學repeat，輾轉間去左美國番學，今次番返來只係探下親人、朋友。佢話佢好enjoy 係美國o既生活，上午做 part-time，下午去U讀 account。有條女，又渣車，入籍埋美國，應該唔會再返o黎香港。

我都登佢高興，心諗如果佢係香港，會唔會有咁o既生活呢? 我想講o既係，有好多野你係唔知嫁。我地o黎 d港燦考左CE、過左AL，大學畢業咁又點? o黎個世界咁大，有咁多野，人生中有咁多你遇到o既人，你控制得幾多? 你知將來會點咩?

近來身邊有幾位朋友，因唔同o既事，令佢地唔開心，係到希望佢地明白，世事無常，who knows? 你今日遇到o既野，未必唔係好事。多關心你現在擁有o既野啦 -- 你o既家人，你o既老友記。

地產演譯員

2006-07-19T20:41:00.000+08:00

今朝聽到新聞，話依家地產市道差，又近收樓期，市場擔心會引發撻訂潮。之次後就訪問一個中原o既地產董事，佢條粉腸話喎，如果d 業主肯蝕讓 5- 8%，市場一定會有人承接，唔擔心有撻訂潮。

佢老味，見人講人話，見鬼講鬼話。市度好就叫人買樓、抄樓。「拿，陳生，依家市度咁好，買層樓o黎投資啦，o黎個映班園，一個月升十零個巴仙，無問題啦，到時轉手記緊搵番我呀。」好啦，依家就話，「陳生，依家市度唔好，如果你真係負擔唔度，唔好上會啦，你肯cut10%，我盡幫你搵客。」cut一成咪等於輸曬lor。好一個地產佬，過左海就係神仙，我覺得佢地重叻過股票演譯員。

八成半身家

2006-07-04T21:20:00.000+08:00

o黎個月，有好多男仕只做三樣野 -- 返工、睇波、訓。寫 blog? 有idea，都無力寫。難得一連兩日有時間，就寫下慈神啦。

股神巴菲特剛宣佈捐出八成半身家做慈善，合供三千億港紙。睇o左o黎個報導，就更加覺得自己供養小朋友係正確。雖然自己付出果d係蚊比同牛比，但自己亦希望可以繼續學習股神做人處事o既態度。

捐八成半身家出身o黎，有邊個做得到? 唔好話八成半，一成半都已經好肉痛吧? 當然股神剩低o既一成半身家已經有530億，上曬岸。相反有d人標榜自己搵大巴錢，但係慳都你唔信，表面風光、內裏縮骨。真係想嘔!

之前已經講過點解要先幫中國小朋友，而今次我特別要求宣明會要係助養女仔。唔好以為我有特別辟好，而係我睇左「人間蒸發」，劇入面o既女仔好慘，所以希望幫d女仔先。有朝一日，我自己上曬岸，希望捐一成半身家比有需要o既人啦。

一分耕云，一分收獲

2006-07-03T22:17:00.000+08:00

「一分耕云，一分收獲。」係我非常同意之事。要有回報，一定要有相等的付出，o黎個咪係鋼之鍊金術師o既重點??

有好多人會以為我今天得到o既野，係屋企比我o既，我不得不承認家人打本比我，但賺回來的全是經自己手得來的。

我付出了什麼? 當人地星期六、日去行街、睇戲、食飯、拍拖之時，我好多時都係家中看報紙、睇財經透視等。富爸爸的書，我買了3本，在圖書館看了5本。近一年的信報月刊，我都睇過。近半年的信報，九成都睇左，咁你話 d 錢係唔係天跌落o黎呢?

而得到的同時，我亦學識o左回饋社會。家中o既金錢大部份係大陸賺到，所以我已決定助養中國大陸的小朋友，令佢地有書讀，所謂「長貧難顧」，唯教育可令他們脫貧。依家可能助養一個，希望將來做倒生意有固定收入，助養多幾個。要付出先有回報，唔係只係講你努力搵銀; 你今天幫助有需要的人，他日可能有你會得到更多。

收o爹

2006-06-13T23:54:00.000+08:00

聽番有d舊同學講，呀邊個邊而家個搵幾錢一個月wor，呀邊個邊係政府咩署到做，而家高薪厚職(所謂)，就目中無人。

我呸。咪又係打份工，咪又係坐巴士。

o黎d人以為自己搵個少少錢就好巴閉，富而知貧窮，我敢講佢地咩叫有錢都唔知。井底之蛙，夏蟲不可語冰。

佢地睇o既野，係來緊一年，人工加幾多，有幾多 Bonus，而我係睇緊 3 、5 年後o既事。所以我好想叫o黎d人「收o爹」。

紙皮、銅鐵、零用錢

2006-05-31T23:42:00.000+08:00

回收紙皮，對外國o既小朋友而言，係一種環保活動; 不過，對香港一d小朋友黎講，會係一種搵零用錢o既方法。

剛過去的星期二檔案，TVB追訪左兩家貧窮家庭，有幾位12-13歲，讀六年級o既小朋友要靠賣紙皮、爛銅爛鐵去搵少少零用錢。一車仔，拾零廿蚊。有調查話全港有三十七萬兒童生活係貧窮線以下，其中有2000人要靠從事不同o既工作以賺取生活費。

香港真係咁好景咩?真係越來越同意老曹所講，香港到了一個「二次元經濟」。再看看同樣是六年級的細佬，PS2、GBA、Nike 波鞋、圍棋班、有線電視，我都係覺得依家 d 小朋友係要鍛鍊下，下年暑假一於要佢番大陸軍訓。

World Cup

2006-05-29T00:43:00.000+08:00

又到四年一度o既世界杯啦，我自己其實無邊隊特別支持，雖然我好鍾意利記，但我一 d 都唔支持英格蘭。有位網友同我一樣，佢希望英軍早 d 出局，等利記 d 球員早 d 休息，唔好傷，真係講得好!

世界杯一到，電視節目一定會重溫歷屆世界杯o既片段，剛睇o左有線播番 98 年法國奪得世界杯片段，杜林o既犯錯，之後佢入番兩球補數，Zidane個禿頭決賽頂入兩球，帶比大家美麗回憶。而我同時又會諗番起當年o既自己，98年o既我係到做緊咩呢?

98年，98年......我諗起我係一個剛考完會考的黃毛小子。八年，咁就八年。我係o黎八年過成點呢?來緊o既八年我又會係點呢? d 咁o既問題不斷係腦海中到轉。係唔係只係希望將部 C 仔轉部 E 仔就係目標呢?世界杯，不論你鐘唔鐘意睇波，你都會發覺佢帶比你興奮、感慨o既回憶。

世界變

2006-05-02T17:45:00.000+08:00

細個o既時候，成日聽阿爸阿媽講世界變，係電視上又有不同新奇o既事發生，真係「怪事年年有、今年特別多」。但計我話依家先係世界變。

我o地十多年前有無諗過會有「港燦」、「香港黑工」咁o既詞語呢? 今日睇報紙頭條係「尖沙嘴 LV、Gucci大排長龍，內地客迫爆名店」。而新聞報導係「港人黑工」澳門被捕。

唔知香港d女仔睇完會唔會繼續崇尚 LV，Gucci 呢? 如果佢地係街見到對面個自由行 C 9 渣住個同自己一樣個袋，又會唔會收埋呢?

香港有黑工我o地聽得多，「香港黑工」你又聽過未? 原來依家香港好多做建築o既人去澳門做黑工，一個月人工有成萬六蚊，仲多香港約四成。

香港人星期六、日番大陸飲茶，Dup骨，人o地放假o黎香港掃LV、掃金鋪、掃樓; 香港人去澳門做黑工，人o地球球聲o黎香港抄國企，去澳門豪赌。咁都唔係世界變?

通街都係股神

2006-04-06T20:42:00.000+08:00

人其實係好奇怪，只會看見眼前o既事物，以往所發生o既事一於小理。

奧云仔不嬲都係我o既偶像，我喜愛他的人品、永不認輸的精神，他離開利物浦，是一年件另我很傷心的事。半年前聽到佢話有機會番來，真係好開心。但原來很多球迷都離開了他，不歡迎他回來。有誰記得他替利記射入 2 球取得足總杯冠軍?

近來行街個個都係到講股票，個個都賺錢，個個都係股神。呀水都賺錢，咁邊個輸呢? 97年一個招牌跌落街可以壓死10個百萬富翁，但又有誰記得佢地一夜無左一半身家。而我? 都係抽下新股幫補下油錢算了。

擁有

2006-03-03T20:31:00.000+08:00

好多時我o地買一樣物件，並唔係一定要在乎佢o既價值，而係在乎你想擁有佢。

例如我大學有個同學，佢明明已經係圖書館睇o左某一本小說，但有一日行街，佢見到本書，就立刻買o左。

我問佢，你唔係睇o左啦咩? 做咩又要買本書o既? 佢話係因為欣賞本書，想擁有o左佢，書o既實質價值不可同心中的一份滿足感比。

我細個o既時候係好鍾意打機，但係遊戲機對我來講真係好貴，當年最勁先係任天堂加部磁碟機，成為 $ 1200 銀。阿爸阿媽係唔會比 $ 我買，而我亦無咁多零用錢。

好啦，到我儲o左兩年利是錢，有錢買。有唔係玩 floppy games，變o左玩 CD，如PS、Saturn，成為 $1500。老天爺，你在玩我嗎? 當d 朋友話到我屋企玩，問我有咩 games，我話玩緊 J-league 足球，佢地話......o下?

唔知係唔係因為細個o既時候得唔到，依家想搵番以前o既滿足感。所以我 n 年前 $3000 銀一部 PS2 都買，X-box 想買、Game-cube 又想買。依家出 X-box 360 又勁想買，買黎做咩? 買黎擺，我有幾何打機?

麥記與叉飯

2006-02-13T19:53:00.000+08:00

放工的途中，好多時會經過一個公屋商場，它在我年輕時養活了我和我大細佬。

讀中一、二的時候，呀爸呀媽都係打份牛工，好多時都會加班。見呀媽七點都未番，自然會打去佢間廠，「喂，呀媽，你係唔係開夜呀?」。其實九成都係，只是打去confirm 下。

跟住，呀媽會話，你睇下雪櫃有無隔夜餸，有o既，同細佬搞點。如果無，你地去買野食啦。(好多時都無)

問題就出現啦，買咩野食? 我地倆兄弟，好多時想去個公屋商場間麥記買野食，但係會比呀媽話貴。

無錯，係貴!!! 倆兄弟一人一個餐，要成四十蚊，當時對我地黎講，一餐食成幾十蚊，係好奢侈的。

阿媽多數建議，去麥記樓下o既街市買叉燒飯食，十雞一盒，兩盒廿雞，雙併$12。阿媽話，一個買叉燒飯、一個買切雞飯，撈埋咪雙併攞。係wor，無理由無啦啦比 4 蚊人賺。

到o左今日，麥記對我來說當然不再是奢侈品，我反而認識它是垃圾食品。有好多人話我食野厭尖，希望你地明白，食了幾年、一星期三晚的叉飯，係會對現在的生活要求高 d 。

車牌

2006-02-11T02:37:00.000+08:00

記得讀 U 的時候去學車，係諗住讀書的時候學會容易安排時間，如果第二時出黎做野，無咁多時間學。

d 同學和朋友知道第一句就話:「曬氣啦，你有車咩?」

奇怪，個個有車先學，駕駛學院咪要接得?

你去學潛水先買一套設備先咪好 come 計?

好啦，之後人地跟住就問，你學棍波定自動波，我話自動波。

都未講完，d 人就話，你咁 Q 蠢嫁，學棍波包埋自動波，你學貨 van 咪包曬攞。

我心諗，我又唔係想揸貨 van 搵食，學貨 van 做咩呢?

「咁你可以學私家車掍波吧，幾型。」友人說。

但係佢地都係唔明，我將來一心揸平治、寶馬，掍咩波?

當日，他們揸住張1或 2 牌向我蘇出 ;今天，我只有揸住張1A 牌及病屎。

所以話，做人要睇遠 d ，睇闊 d ，果 d 細微細眼的小事不用大事張揚，更不用去串人，因過了幾年後，你先會發覺，那些才重要，那些才叫瀟灑。

名牌

2006-02-03T21:43:00.000+08:00

初中的時候，家境只是一個溫飽家庭，三餐一宿是足夠的。

不過要追求靚衫、靚鞋、靚袋真是很難。

身邊的同學不斷蘇出他們的 York 西褲、MD 袋、Dr. Mar 皮鞋。講真，有一段時間都覺得他很好型，同自己講，希望屋企比多 d 零用錢，(當時呀媽比 $ 120 蚊一星期番學)，好等自己可買番條 York 啦，看見自己的旺角女人街 79 雞黑褲(講價 $ 75) 快要到腳脛，都覺好肉酸。

後來，想深一層，鬼叫自己屋企窮咩，不要恨咁多，他朝有一日自己搵到先買啦。

到今天，先發覺家人節檢係好o既，不然的話我點可學識儲錢同投資呢? 如果唔係，我又點可買自己人生中的第一部病屎?

回到過去

2006-02-03T21:32:00.000+08:00

近來到了一個新環境工作，是以前生活了十三年的地方附近，番工的路不是很熟悉嗎?工作的機構，正是中學的兄弟姐妹吧，不禁回憶起當年的生活情境，同時看看現在的自己，究竟在十多年後的我今天變成了怎樣呢?回家後便開了一個 blogger，作一個記錄好，作一個分享亦好。